ओली माती दारोदारी

पाऊस ओला, माणूस ओला, ओली सर घरोघरी  

आंगण ओले, पैंजण बोले, ओली माती दारोदारी 

क्षणात हिरवळ, क्षणात भुरळ, क्षणात ढगांची वर्दी 

गार वारा, नदीचा किनारा, वाहत राहावे गावोगावी 

झाडांची पाने, पक्षांची घरटे, झुंजणारी झोपडी ती 

शेतात पाणी, रस्त्यात पाणी, चोहीकडे पानिपाणी 

शाळेची सुट्टी, पावसाची मस्ती, गरमागरम भजी 

विजांची कडकड, धरणांची गडबड, थोडीथोडी

मातीचा गंध, प्रीतीचा बंध , स्पर्शाची जादू सारी 

सहवासाची, प्रेमाची, पावसातच मिळे गोडगोडी 

कुठे गप्पागोष्टी, कुठे गाणी, कुठे कवितांच्या ओळी 

कुठे श्रावण, कुठे पावन, निसर्गाच्या अवतीभवती 

कुठे रडू, कुठे हसू, कुठे सुखदुःखाची बातमी 

शेतकऱ्यांची, कामगारांची, परीक्षाच ही वेळोवेळी 

सचिन कृष्णा तळे 

पुणे , कात्रज