गुन्हेगारीच्या विश्वातल्या शोधकथा

 

गुन्हेगारीच्या विश्वातल्या शोधकथा

क्राईम च्या घटना ह्या आपल्याला नव्या नाही. आपल्या आसपास , शेजारी किंवा ऑफिस किंवा मित्र परिवारात कुठे ना कुठे गुन्हा हा घडत असतो मग तो अंधारात असो किंवा उजेडात. ह्याच गुन्हेगारीवर आधारित काही बातम्यांचे सत्र हि चालू असते. ते आपण पाहतो कारण गुन्हा कसा घडला का घडला हे पाहताना आपल्याला उत्सुकता लागलेली असते. समोरच्या हातून गुन्हा का घडला ? हत्येचे कारण काय ? पोलिसांनी त्याचा तपास कसा केला? ह्या शोधमोहिमेत पोलिसांना काय त्रास झाला ? त्यातून त्या गुन्हेगाराला काय शिक्षा झाली ? असे अनेक प्रश्नाचे उत्तर आपण त्या मालिकेतून पाहत असतो. पण त्या टीव्ही वरच्या त्या मालिका पाहण्यापेक्षा शब्दांच्या चौकटीत असणाऱ्या क्राईमच्या कथा वाचण्यात आणि त्या समजावून घेण्यात एक वेगळीच नशा आहे.

 

प्रा. अनंत वासुदेव वाईकर ह्यांच्या " माझ्या बायकोला फाशी द्या " ह्या त्यांच्या दहाव्या पुस्तकात रसिकांना वाचकांना अश्याच काही रहस्यमय कथा वाचायला मिळतात. पुस्तकाचं शीर्षक पाहून तुम्हाला काहीतरी वंगाळ वाटेल पण पुस्तकातील कथा वाचताना तुमची उत्सुकता कुठे हि कमी पडणार नाही अश्या प्रकारे पुस्तकात कथांची मांडणी केली आहे. गुन्हेगारीच्या विश्वातल्या एकूण आठ कथा ह्या पुस्तकात असून १७६ पाने आहेत. या कथासंग्रहातील कथा पूर्णपणे काल्पनिक आहेत लेखकाच्या विचारातून मांडलेली आहे. या कथासंग्रहातील प्रत्येक कथेत खुनासारखी खळबळजनक घटना घडलेली असून त्या घटनेला जबाबदार असणारा गुन्हेगार इन्स्पेक्टर व्ही. अनंत पोलीस अधिकारी आपल्या सहकाऱ्यांसोबत शोधून काढताना दिसतात. "माझ्या बायकोला फाशी द्या" , "निष्पाप बाली" ," शाल आणि उशी ", " जखम " , " निर्दोष दोषी " , " मेंदीने रंग भरला " , " एक म्यान दोन तलवारी " , " अपहरण " अश्या आठ कथा आहेत .

 

ह्या कथेतील कथा ह्या काल्पनिक जरी असल्या तरी लेखनातील सर्व घटना ह्या सामान्य वाचकाच्या दैनंदिन जीवनात घडणाऱ्या आहेत असे लेखकाला वाटते. वाचक हे पुस्तक वाचताना रममाण होऊ शकेल. पुढे काय घडणार आहे ? खरा अपराधी कोण आहे ? अश्या अनेक प्रश्नात वाचक गुंतून राहील तसेच त्याबद्दल उत्सुकता वाटेल अशी अपेक्षा प्रा. अनंत वासुदेव वाईकर ह्यांना वाटते.

 

पुस्तक - माझ्या बायकोला फाशी द्या

लेखक - प्रा अनंत वासुदेव वाईकर

प्रकाशक - संस्कृती प्रकाशन

किंमत - २५०