झेंडे हजार रंगवून झाले
नेते पालखीत बसवून झाले
लोकशाहीचे स्वप्ने पाहताना
दिस गुलामीचे आठवून झाले
मोर्चे बंद आणिक भाषणे
शंभर वेळा ऐकून झाले
दाराआड त्या बंगल्यामध्ये
कार्यकर्त्याना फसवून झाले
सत्तेसाठी जगता जगता
सत्याला पार ठेचून झाले
स्वातंत्र दिस येता जवळी
ईमान स्वतःचे राखून झाले
अनेक जाती अन धर्मातुनी
असंख्य धागे विणून झाले
त्याच धाग्यातून एक तिरंगा
अभिमानाने फडकवून झाले
- सचिन कृष्णा तळे
