विठ्ठलाच्या सोबतीने

विठ्ठलाच्या सोबतीने

विठ्ठलाच्या सोबतीने रुक्मीणी सुंदर दिसते
राधेच्या प्रेमाची ती प्रेम कहाणी सुंदर दिसते

द्वारकेला सांगा कृष्ण हरवला माझ्या गावी
गावात चंद्रभागेचें वाहते पाणी सुंदर दिसते

विठू एकटा नाही सोबत संतांचा हा पसारा
वाळवंटी बहुजनांची अभंगवाणी सुंदर दिसते

एकादशी ला जत्रा भरते ..  पंढरीच्या द्वारी
भक्तांची त्या देवाशी बांधणी सुंदर दिसते

तीर्थ पुंडलिकाचे कळस तुका ज्ञाना झाला
वैष्णवांच्या खेळाची ही मांडणी सुंदर दिसते

किती नामघोष किती पताका केशरी डोले
पायरीस स्पर्श होता जीवन गाणी सुंदर दिसते

सचिन कृष्णा तळे 
पुणे
७७०९०९९६४६

राष्ट्रगीत गाऊ ..

राष्ट्रगीत गाऊ ..

राष्ट्रगीत हे मंत्र राष्ट्राचे, प्राणाहुनही जपू
देवभूमीच्या प्रांगणात,चला आनंदे गाऊ .. राष्ट्रगीत गाऊ ..

वंद वंदे मातरम, पेटती लख क्रांती दिवे
तेजाने शूरतेने, सैन्याचे सज्ज अमर थवे
ह्या राष्ट्राचे कर्ते आपण राष्ट्र ध्वजा ही जपू
देवभूमीच्या प्रांगणात,चला आनंदे गाऊ .. राष्ट्रगीत गाऊ ..

चहूदिशानी प्रकाशगंगा वाहे संविधानाने
पूर्व दिशेने भारताची विजयी पाऊल उमटे
श्रुंखला ही जयजयकाराची आज पुन्हा जपू
देवभूमीच्या प्रांगणात,चला आनंदे गाऊ .. राष्ट्रगीत गाऊ ..

शत्रूंचे थैमान असे अन पदोपदी निखारे
तुजला ठार करण्या म्लेंछ चाले शतकाहून शतके
जी छबी भारताची आहे तोच हिंद आज पुजू
देवभूमीच्या प्रांगणात,चला आनंदे गाऊ .. राष्ट्रगीत गाऊ ..

तुझेच बलिदान देशा डफावर तुझे यशोगान
हिमवंत उभा बलवंत तुझाच आहे अधिकार
देश धर्म हाच एक आपुल्या मंदिरी जपू
देवभूमीच्या प्रांगणात,चला आनंदे गाऊ .. राष्ट्रगीत गाऊ ..

हिंदू मुस्लिम शीख इसाई बुद्ध भाई भाई
रंग एक सगळ्यांचा भारत तिरंगा परी
क्रांतिकारकांच्या रक्ताची लाज आज राखू
देवभूमीच्या प्रांगणात,चला आनंदे गाऊ .. राष्ट्रगीत गाऊ ..

सचिन कृष्णा तळे 
पुणे
७७०९०९९६४६

माझी मुलगी

माझ्या नशिबी, माझी मुलगी

किती कोवळी, किती भोळी, किती प्यारी आहे ती 

माझ्या नशिबी, माझी मुलगी, किती न्यारी आहे ती 

रोज येता कामावरूनी, देते प्रेमळ आलिंगन मला 

जणू सोहळे आनंदाचे, विरून जातो थकवा माझा

घरात असतो कल्लोळ आणिक खेळ दोघांचा 

चोरून पहाते आई माझी, सोबत असते बायको ती 

किती कोवळी, किती भोळी, किती प्यारी आहे ती 

बोबड्या स्वरात ती, खुणवते मज काही बाई 

लाडात असते रोज, येता बाप लवकर घरी 

खाऊ नको तिला, नको असते दुनियादारी 

घेऊन चला बागेत, धरते हट्ट  रोज रोज ती 

किती कोवळी, किती भोळी, किती प्यारी आहे ती  

माझ्या परीला आवडते, गोष्ट राजा राणीची

मोठे महाल अन जंगलातल्या वाघोबाची 

ऐकत बसते निवांत झोपते कुशीत माझ्या 

विसरून जातो जग सारे, अशीच असते रोज ती

किती कोवळी, किती भोळी, किती प्यारी आहे ती   

शाळा कॉलेज ची वाट चालेल होईल मोठी ती 

येईल राजा जाईल सासरला सोडून आठवणी 

दिवस कसे भर्रकन उडून जातील हातामधुनी 

माझ्या सोबत राहतील फक्त माझ्या परीची गाणी 

किती कोवळी, किती भोळी, किती प्यारी आहे ती  

थकलेल्या हाताने जेव्हा, हाक मारेल देवा 

दिसावे सुखी संसार तिचे, इतकीच असेल ईच्छा 

त्या कोमल हाताने घडला होता बाप माझ्यातला 

माझ्या नशिबी, माझी मुलगी आहे जीवन सरी  

किती कोवळी, किती भोळी, किती प्यारी आहे ती  

सचिन कृष्णा तळे 

पुणे 

स्वामी नामाचा,लागो मज, छंद छंद ...

स्वामी नामाचा,लागो मज, छंद छंद ...

मी भक्त त्यांचा सेवेकरी

असे कृपा त्यांची मजवरी

दुःख  हरी नि सुख करी

स्वामी आमचे गिरिधारी

आज पाहावा, जिथे तिथे, आनंद आनंद  

स्वामी नामाचा,लागो मज, छंद छंद ...

अजानबाहू रूप सावळे

अक्कलकोटी देव मिळे

समर्थांची नि वडाची

चोहीकडे दत्त सोहळे  

दिगंबरा दत्तात्रयाचे, दिसे असे, रंग रंग

स्वामी नामाचा,लागो मज, छंद छंद ...   

स्वामी माय स्वामी बाप 

स्वामी आमची चारी धाम 

विश्वेश्वरा हे शंकरा 

अक्कलकोट हेच कैलास 

स्वामी स्पर्शाने स्वामी कीर्तने रंगे अभंग अभंग 

स्वामी नामाचा,लागो मज, छंद छंद ...  

सचिन कृष्णा तळे 

पुणे 

माझी मायं

शेतात बाप राबतो सोबत असते माझी मायं
खेड्यातलया विश्वात कशी सजते माझी मायं 

शेणा मातीचं घरं त्याचा उंबरटा असे पवित्र
संस्काराचे धन लुटते शिकवते माझी मायं 

प्रवास करावा पाखराणी ज्या ज्या वाटेवर
त्या वाटेची मग दिशा ठरवते माझी मायं

मालभावाला कंटाळून बाप निजतो रातील
त्याच्या सोबत उपाशी निजते माझी मायं

तिच्या पदरी जणू नांदतो विठू पंढरीचा
दुष्काळाने जेव्हा ... हंबरते माझी मायं

मातीचा गंध सांज वेळी जेव्हा दिवे पेटवतो
तेव्हा तुळशीचे आंगणगीत गाते माझी मायं

सचिन कृष्णा तळे 
पुणे 

पावसाळी रात्र ही...

पावसाळी रात्र ही...

पावसाळी रात्र ही, चंद्र ही भिजला होता !
मिठीत प्रेमाने तो, एकदा निजला होता !

लाज माझी वेडी, ओठांवरुनी बावरली
मी ही सजली होती, तो ही सजला होता !

मधुचंद्राच्या आंगणीं, त्या मदनच्या द्वारी
दोघासांठी रिकामा, एक मजला होता !

स्पर्शाची जादू होती, मी माझ्यात नव्हती
खेळ हा निसर्गाचा, कोणी रचला होता  !

टाळता आले ना काही, होकार दोघांचाही
मी ही रमली होती, तो ही रमला होता !

नेमके होतो कुठे, दोघांस ठाऊक नव्हते
जरा हारली मी, जरा तो जिंकला होता !

सचिन कृष्णा तळे
पुणे
७७०९०९९६४६

कोणता पक्ष कोणता नेता हवा तुम्हाला
विकासाला राजा जाणता हवा तुम्हाला

मतदार आहात कि आहात सौदागर तुम्ही
देशासाठी सत्तेवर खरा कर्ता हवा तुम्हाला

खुप झाले राजकारण खुप झाला विकास
लोकांसाठी राबणारा आता हवा तुम्हाला

कळुन चुकेल तेव्हा नुसती होती बडबड
चांगल्या राजकारणीचा पत्ता हवा तुम्हाला

घोषणा भाषण आश्वासन मिळेल फक्त
निवडणुकीत कसा भत्ता हवा तुम्हाला

हातात टाळी नको आता असावी गालावरती
तुमच्यासाठी तसाच कार्यकर्ता हवा तुम्हाला


#सचिन_तळे

www.sachinktale.blogspot.com